‘राष्ट्रको लागि खेलकुद, स्वास्थ्यको लागि खेलकुद’ भन्ने मूल नाराका साथ जापानको राजधानी टोकियोमा प्रथम एनआरएनए रनिङ कप पुरुष भलिबल प्रतियोगिता हुने भएको छ । नेपालको राष्ट्रिय खेल भलिबललाई विदेशमा पनि प्रवर्द्धन गर्ने मूल उद्देश्य सहित ‘प्रथम एनआरएनए रनिङ कप भलिबल प्रतियोगिता २०२३’ हुने भएको हो ।

एनआरएनए जापानले विदेशमा खेलकुदको माध्यमले एक आपसमा भाइचारासमेत बढाउने हुँदा प्रतियोगिता आयोजना गर्न लागेको एनआरएनए जापानका अध्यक्ष शिवप्रसाद पौडेलले बताउनुभयो । प्रतियोगिता मे २२ तारिख सोमबार टोकियोको ‘Shinjuku Cosmic center’ मा हुने बताईएको छ ।

भलिबल प्रतियोगिताको संयोजकको जिम्मेवारि एनआरएनए जापानका केन्द्रीय सदस्य रामबहादुर थापा (काजी) दिइएको छ । उहाँले  यसअघि पनि गलकोट समाजमा रहँदा विभिन्न समयमा यस्ता प्रतियोगिताहरू आयोजना गरी सफलता पूर्वक सम्पन्न गरिसक्नु भएको छ । भलिबल खेलका खेलाडी समेत रहनुभएका थापाले एनआरएनए जापानद्वारा पहिलो पटक 

आयोजना गर्न लागेको यो प्रतियोगिता सबैको सहयोगमा सफलता पूर्ण सम्पन्न गर्न आफू लागिपर्ने बताउनुभयो ।  

नेपाल भलिबल संघ जापान शाखाका उपाध्यक्ष तथा प्रतियोगिताका खेल संयोजक समेत रहनुभएका  भलिबल खेलाडी वसन्त थापाकाअनुसार प्रतियोगितामा विजेता टिमले ३ लाख ५३ हजार ५ सय ३५ येन, मेडल, प्रमाणपत्र र उपविजेता टिमले २ लाख ५२ हजार ५ सय २५ येन, मेडल, प्रमाणपत्र प्राप्त गर्नुका साथै खेलमा वेस्ट प्लेयर, वेस्ट स्पाई कर, वेस्ट सेटर, वेस्ट क्युकर, वेस्ट डिफेन्डर र वेस्ट कोच गरी ६ वटा विधामा उत्कृष्ट छनौट गरी पुरस्कार वितरण गरिनेछ समेत जनाईएको छ ।

प्रतियोगितामा समावेश हुनका लागि दर्ता शुल्क ४० हजार  येन निर्धारण गरिएको र प्रतियोगिता बिहान ९ बजेबाट बेलुकी ६ बजे सम्म रहने जानकारी गराउँदै सम्पूर्ण खेलप्रेमीहरुलाई खेलमा समावेश हुन एनआरएनए जापानका प्रवक्ता सुवास लामिछानेले अनुरोध गर्नुभएको छ ।  प्रतियोगिता नेपाल भलिबल संघ जापानको समन्वयमा हुने बताइएको छ ।