टोकियो, जापान ।  

राष्ट्रिय स्वतन्त्र पार्टी (रास्वपा) को प्रथम स्थापना दिवसको अवसरमा जापानमा पनि विभिन्न कार्यक्रम गरिएको छ । 

सो अवसरमा प्रवास नेपाली सम्पर्क विभाग जापान कान्तो क्षेत्रीय समितिले भौतिक उपस्थिति अनि भर्चुअल माध्यमबाट एक बिहीबार एक कार्यक्रम सम्पन्न गरेको छ । 

समितिका सभापति प्रेमप्रसाद कँडेलको अध्यक्षता र रास्वपा केन्द्रीय सदस्य तथा प्रवास विभाग उप-प्रमुख केशव अधिकारीको प्रमुख आतिथ्यतामा सम्पन्न सो कार्यक्रममा शुभकामना आदान-प्रदानसहित विगतमा गरिएका गतिविधिको समीक्षा र आगामी दिनमा गर्नुपर्ने जनपक्षीय कार्यक्रम र योजनाहरूको बारेमा अन्तरक्रिया गरिएको जापान कान्तो क्षेत्रीय समितिका महामन्त्री कमल बजगाइँले जानकारी दिए ।

सो अवसरमा रास्वपा प्रवास नेपाली सम्पर्क विभाग जापानका सभापति दिलेन्द्रप्रसाद जोशी र महामन्त्री खेमराज पौडेलले रास्वपाले गरेका विविध कार्यक्रमहरू, यसले जापानमा रहेका प्रवासीहरूमा पारेको प्रभाव, समिति गठनमा बढेको आकर्षणलगायतका विषयमा जानकारी दिएका थिए । 

रास्वपा प्रवास नेपाली सम्पर्क विभाग जापानका केन्द्रीय सदस्य प्रकाश आचार्यका अनुसार, पार्टी स्थापना दिवसको अवसरमा नै प्रवास नेपाली सम्पर्क विभाग जापानको संयोजनमा भरतपुर महानगरपालिका वडा नम्बर-५, चितवनमा रहेको बालबालिकाहरुका लागि प्रहरी नागरिक अभियान नेपाल (पिटुसिटु) संस्थालाई शैक्षिक सामग्री, पोशाक तथा खेलकुद सामग्री प्रदान गरिएको छ । रास्वपा भरतपुर–४ की सभापति शान्ति थापाले पार्टीको विदेश शाखाले गरेको कार्यले सिङ्गो पार्टीको उचाइँ बढ्ने विश्वास व्यक्त गरिन् ।

पिटुसिटु व्यवस्थापन समितिका अध्यक्ष बेलबहादुर गुरूङले बेसहारा बालबालिकाको क्षेत्रमा आउने जुनसुकै सहयोग पनि महत्वपूर्ण हुने बताए । वि.सं.२०७२ सालमा स्थापना भएको पिटुसिटुमा बेसहारा बालबालिकाले अध्ययन गर्दै आएका छन्, जहाँ ३५ जना बालकहरु छन् । यो संस्थाले बजारका सडकमा डुलेर हिँड्ने बालकहरुलाई अभिभावकत्व दिलाउँदै शिक्षादीक्षा प्रदान गर्दै आएको गुरूङले जानकारी दिए।