(2).gif)
तीजको अवसर पारेर गायक सूर्य खड्काको तीज गीत ‘पिर नलेऊ आमाले’ सार्वजनिक भएको छ। गीतले विवाहपछि श्रीमानसँग परदेशमा रहेकी छोरीले आफ्ना आमा–बुबालाई “मेरो चिन्ता नगर्नुस्, म यहाँ सुखका साथ छु” भन्ने आत्मीय सन्देश प्रस्तुत गरेको छ।
गीतमा देवी घर्ती र सूर्य खड्काको सुमधुर स्वर रहेको छ भने शब्द तथा संगीत स्वयम् सूर्य खड्काकै रहेको छ। गीतले परदेशमा रहे पनि परिवारप्रतिको माया, आत्मीयता र जिम्मेवारीलाई सकारात्मक ढंगले अभिव्यक्त गरेको छ।
भिडियोमा तीजको सांस्कृतिक पक्षलाई आकर्षक ढंगले चित्रण गरिएको छ। परम्परागत तीज गीतहरूमा माइतीको सम्झना र विरहका भाव प्रमुख रूपमा प्रस्तुत हुने गरे पनि यो तीज गीतले फरक सन्देश बोकेको छ। गीतमा परदेशमा रहेकी छोरीले आफू श्रीमानसँग सुखी, सुरक्षित र खुसीका साथ जीवन बिताइरहेको बताउँदै आमा–बुबालाई अनावश्यक चिन्ता नगर्न आग्रह गरेकी छन्।
परिवारप्रतिको माया, विश्वास र सकारात्मक सोचलाई केन्द्रमा राखेर तयार पारिएको यो गीत ‘सूर्य खड्का’ युट्युब च्यानलमार्फत सार्वजनिक गरिएको हो। सार्वजनिक भएसँगै गीतले दर्शक तथा श्रोतामाझ सकारात्मक प्रतिक्रिया प्राप्त गरिरहेको छ।
