(2).gif)
भारतविरुद्धको दोस्रो मैत्रीपूर्ण फुटबल खेलमा नेपाल पराजित भएको छ । आइतबार घरेलु मैदानमा नेपालले भारतसँग २–१ गोलको हार बेहोरेको हो ।
त्रिपुरेश्वरस्थित दशरथ रङ्गशालामा भएको उक्त खेलमा भारतका लागि फारुख चौधरी र सुनिल क्षेत्रीले एक–एक गोल गरे । नेपालका लागि तेज तामाङले एक गोल फर्काए ।
पहिलो हाफ गोलरहित बराबरीमा सकिएको उक्त खेलको ६१औँ फारुखले गोल गर्दै भारतलाई सुरुआती अग्रता दिलाएका थिए ।
खेलको ७५औँ मिनेटमा सुनिलले गोल गर्दै भारतको अग्रता दोब्बर बनाए । खेलको ८४औँ मिनेटमा तेज तामाङले एक गोल फर्काए ।
यसअघि बिहीबार पहिलो मैत्रीपूर्ण खेल खेलेका नेपाल र भारतले १–१ गोलको बराबरी खेलेका थिए । जसमा नेपालका लागि अञ्जन विष्ट तथा भारतका लागि अनिरुद्ध थापाले गोल गरेका थिए ।
माल्दिभ्समा आयोजना हुने साफ च्याम्पियनसिपको तयारीका लागि नेपाल र भारतले मैत्रीपूर्ण फुटबल खेलेका हुन् । साफ च्याम्पियनसिप आगामी असोज १५ देखि ३० गतेसम्म आयोजना हुने तालिका छ ।
